|
Jafnvel hinn minnsti froskur er mikill í sínum eigin forapolli
|
|
|
|
|
|
|
|
|
|
miðvikudagur, mars 30, 2005
!!!!!!!!!!TIL HAMINGJU MEÐ AFMÆLIÐ HANNES ÞÓR!!!!!!!!!!
![](http://www.simnet.is/bernes/hanneslitliminni.JPG)
Eiginmaður minn, það gull af manni á 31 árs afmæli í dag. Ég er búin að baka rice crispies kransaköku og það verður opið hús í kvöld fyrir þá sem vilja koma og kyssa hann.
3/30/2005 01:04:00 f.h.
þriðjudagur, mars 29, 2005
Páskarnir voru bara súper fínir. Við vorum dugleg og löt til skiptis og snæddum þetta fallega ástaregg:
![](http://www.simnet.is/bernes/astaregg.JPG) Það var valið vegna táknrænu sinnar en á toppi þess má sjá ástfangin og stolt hænsni horfa á ungann sinn í hreiðrinu. By the way, þá eru komnar fleiri bumbumyndir á barnalands síðuna
Við snæddum dýrindis mat í boðum á mestu tyllidögunum en hina dagana var ekki síðri matur því það kom í ljós að Hannes er hörkukokkur. Ég hef ekki viljað hleypa honum mikið að áður því að það er mikið offors á honum, hann veður í skápana og er búinn að skvetta tómatsósu, súkkulaðismjöri, ávaxtasafa og chillíkryddi á matinn áður en maður veit af. Ég er afar stressuð yfir slíkri matargerð enda uppskriftafasisti mikill en nú var ég orðin svo þreytt að ég leyfði honum að flippa út og sá ekki efir því. Í kvöld reddaði hann meira að segja live dinnertónlist:
![](http://www.simnet.is/bernes/dinnerminni.JPG) (...og bannað að fríka út yfir víninu á myndinni - ég fékk mér bara botndreytil fyrir blóðrásina)
3/29/2005 04:19:00 f.h.
fimmtudagur, mars 24, 2005
![](http://i.xanga.com/heavenspromise/pregnant_woman_mirror_sizing_up_lg_nwm.gif) Hæ. Ég er enn hér. Er ekki einu sinni búin að eignast barn eða neitt. Málið er bara að tölvan er á efri hæðinni og ég er orðin svo rosalega þreytt og feit að ég nenni ekki að labba upp stigann. Gerði mér grein fyrir því að ég þyrfti að fara að láta "heyra" í mér þegar ég hitti manneskju í dag sem dauðbrá þegar hún sá mig því hún hafði ekki heyrt í eða af mér svo lengi. Ég er líka búin að vera í svaðalegri fýlu þar sem ég fékk ekki að fara með á árshátíðina í Prag um síðustu helgi eins og til stóð. Ég var búin að fá grænt ljós um að ég mætti fljúga og þurfti bara að fá læknisvottorð 2 dögum áður. Við skoðun kom hins vegar í ljós að barnið hafði allt í einu tekið upp á því að liggja þversum í bumbunni en ekki með hausinn niður eins og eðlilegt þykir. Ég fékk ekki vottorð því ef ég myndi missa legvatnið í flugvélinni þyrfti ég að komast undir eins í bráðakeisaraskurð. En krakkagormurinn er auðvitað kominn aftur á sinn stað núna eins og hann hefur alltaf verið. Hann vildi bara ekki fara með til Prag. Hannes fór en var svo yndislegur að hringja reglulega til þess að segja að það væri ekkert gaman. Svo kom hann líka aftur færandi hendi með gjafir handa mér og þverhausnum: Barnaföt, nærföt, iPod og dýrindis ilmvatn (DKNY - Be Delicious) sem er besta ilmvatn sem nokkurn tímann hefur húð mína snert. Hann er smekkmaður. Svo aumkaði Bryndís sig yfir mig og bauð mér í mat, verslunarleiðangra o.fl. svo tíminn var fljótur að líða.
Í fréttum er annað helst að Sunna (sem var mánuði óléttari en ég) og Engilbert eru búin að eignast sitt eintak. Ég fór að skoða hann í dag og það verður erfitt að toppa þá afurð. Gullfallegur drengur, enda með gulu og gylltur. Svo er hann með eindæmum vær og rólegur. Manni leið bara eins og maður hefði verið í einhverjum maraþon jóga-, hugleiðslu- og reikitíma eftir að hafa umgengist hann.
Bobby Fisher og nýja júróvisjón myndbandið kættu mig ógurlega. Ég næ aldrei að kaupa páskaegg því Nóa eggin eru alltaf búin eða brotin í Bónus. Það er ekki sniðugt að kaupa sælgætið apaskít þegar sælgæti er keypt í sælgætisbarnum í Hagkaup. Saltið hrynur nefninlega af og þekur hitt nammið í pokanum sem er sérlega hvimleitt þegar súkkulaðiafurðir eru með í spilinu. Talandi um spil þá hvet ég alla til að versla hjá Magna áður en hann hættir. Hann gaf okkur Bryndísi afslátt af Skrabbli þar sem við vorum síðustu viðskiptavinir dagsins og var á allan hátt svo kátur og yndislegur viðmóts að við fórum út með góða tilfinningu í mallanum. Nýja Nóatúns verslunin við Hringbraut er einnig súper flott þó dýr sé. Þeir eru með svona pokastráka svo manni líður eins og heldri borgara. Fyrst ég er komin út í þessa sálma verð ég að minnast á hverfisbúðina mína en Krambúðin við Skólavörðustíg verður opin allt páska"fríið" ef einhverjir verða matar-, nammi- eða vídeóþurfi. Búðin sú er einna merkilegust fyrir þær sakir að þar eru allar myndir hvort sem þær eru á VHS eða DVD á 250 kr. Frábært framtak. Ég var líka að kaupa mér ný sundgleraugu og af þeim þrem laugum sem ég hef heimsótt síðan verð ég að segja að laugin á Seltjarnarnesi er lang lang hreinust. Svo er líka svo gaman þar því þar hlýtt og þar er saltvatn svo maður svínflýtur. Einnig er ekki of margt um manninn. Yfirleitt er hægt að fá braut út af fyrir sig svo það er hægt að synda baksund án þess að klessa á og manni líður ekki eins og sardínu í pottinum. Auðvitað líður mér samt aldrei eins og sardínu heldur eins og hval enda starir fólk miskunnarlaust á mig í sturtunni. Mér finnst það samt svolítið gaman. Ætli ég eigi ekki eftir að þróa með mér strípihneigð með þessu áframhaldi. Ég komst að því um daginn þegar ég var að horfa á Revenge of the Nerds (ó já, til hamingju með afmælið um daginn Lový systir) að það er til orð yfir fólk sem hefur þá tilhneigingu að flassa (berrassast fyrir framan) blinda. Því miður man ég ekki hvert orðið er. Neytendahorni lokið.
Þess má geta að ég fór ekki upp stigann til þess að blogga. Blogg þetta er fært inn í gegnum fartölvu Hannesar sem ég er með uppi í rúmi og nú held ég að það sé heldur betur kominn tími til þess að fara að sofa. Ég er nefninlega að prufukeyra slökunardiska til brúks í fæðingunni. Á meðan á bloggi stóð hefur rúllað á repeat forláta Pan Pipes diskur með vinsælum ástarlögum. Mér fannst þetta algjör hroðbjóður við upphaf bloggs en nú er þetta farið að hljóma vel í eyrum. Það getur ekki verið góðs viti. Góða nótt.
3/24/2005 01:29:00 f.h.
mánudagur, mars 14, 2005
![](http://ology.amnh.org/biodiversity/treeoflife/images/turtles_tortoises/map_turtles.gif) Það er greinilega ekki svo sniðugt að gefa skjaldbökum rækjur nema til hátíðabrigða. Þær drulla eins og ég veit ekki hvað og fnykurinn af búrvatninu er óbærilegur þótt við séum nýbúin að þrífa. Búrið er á annarri hæð og til að þrífa það þarf að hlaupa með vatnsfötur upp og niður þröngan stiga. Ég veit ekki hvað við vorum að pæla að ættleiða þessa skítalabba. Og svo vildi enginn koma með mér á tónleikana sem mig langaði á um helgina og ég er enn í smá fýlu. Þetta fer að verða síðasti séns áður en maður þarf að redda sér pössun fyrir svona hluti. Í staðinn er ég bara búin að vera heima að borða ís, læra og horfa aftur og aftur á þetta og þetta. Og svo bjó Hannes til frumsaminn heitan súkkulaðidrykk með sultu, kanil og kardimommudropum. Ljómandi fínt. Bumburass fór alveg í sykurvímu og iðaði um eins og ég veit ekki hvað.
3/14/2005 06:19:00 f.h.
föstudagur, mars 11, 2005
![](http://www.goacom.com/hotels/anupholidayhomes/relax.gif) Úbbídúbbí, fór í sund og gleymdi handklæði svo ég þurfti að þurrka mér með klósettpappír. Ekki svo skemmtilegt. Ekkert mikið meira að frétta. Horfðum á myndband af fæðingu í foreldrafræðslunni í gær. Ekki eins subbulegt og ég hélt en rosalega eru svona myndbönd alltaf hippaleg. Annars lifi ég bara eins og blóm í eggi, sef til hádegis og svo eru bara stundum tekin viðtöl við mann eins og maður sé kvikmyndastjarna...eða þannig. Það var alla vega hringt frá DV í gær og ég beðin um að tjá mig eitthvað um brúðkaupsdaginn okkar í fyrra fyrir einhvern brúðkaupsþátt í helgarblaðinu. Ég gat ekki neitað enda elska ég þennan sorasnepil og vil styrkja hann á allan hátt. Á kannski eftir að skipta um skoðun þegar ég sé greinina. Ætli það verði ekki búið að snúa út úr orðum mínum, gera mig að glæpamanni eða aumingja og copy peista einhvern ófögnuð inn á brúðkaupsmyndina. Jæja, who cares, alltaf gaman að fá að vera smá celebrity.
3/11/2005 05:42:00 e.h.
miðvikudagur, mars 09, 2005
Allt gott að frétta. Byrjuð að fara í sund og elda fullt af rugli úr Grænukostsbókinni. Búin að kaupa fleiri óléttuföt og er algjör gella. Keypti meira að segja brjóstahaldara með C skál og réði mér ekki fyrir kæti. Kvöldin fara að mestu leyti í lærdóm þar sem ég þarf að hitta stelpur sem eru með mér í hóp og gera verkefni á hverju kvöldi frá 21-00. Við hjónin erum líka byrjuð í foreldrafræðslu. Erum búin að fara tvisvar og sofnuðum í bæði skiptin. Svona grjónapokar eru geðveikt þægilegir. Fullt af fróðlegum upplýsingum og ráðleggingum samt. T.d. var manni ráðlagt að fara að baka brauð til að dreifa huganum þegar fæðingin byrjaði (!!??) og svo sagði konan að það væri sko allt í lagi ef smá "kúkaspörð" kæmu í hita leiksins því ljósmæðurnar væru snillingar í að fjarlægja þau svo lítið beri á. Ekki fannst mér þetta nú sannfærandi. Hvað ef maður fær sprengiræpu? Það yrði nú ekki kósí. Fórum í heimsókn á fæðingardeildinna og skoða allt. Hlakka mikið til að prufukeyra glaðloftið sem konan hvatti verðandi foreldra til að nota óspart. Sem sagt, það er allt frekar boring og heilbrigt að frétta bara. Vildi bara láta vita af mér krakkar mínir.
3/09/2005 07:11:00 e.h.
Allt gott að frétta. Byrjuð að fara í sund og elda fullt af rugli úr Grænu kostabókinni. Búin að kaupa fleiri óléttuföt og er algjör gella. Keypti meira að segja brjóstahaldara með C skál og réði mér ekki fyrir kæti. Kvöldin fara að mestu leyti í lærdóm þar sem ég þarf að hitta stelpur sem eru með mér í hóp og gera verkefni á hverju kvöldi frá 21-00. Við hjónin erum líka byrjuð í foreldrafræðslu. Erum búin að fara tvisvar og sofnuðum í bæði skiptin. Svona grjónapokar eru geðveikt þægilegir. Fullt af fróðlegum upplýsingum og ráðleggingum samt. T.d. var manni ráðlagt að fara að baka brauð til að dreifa huganum þegar fæðingin byrjaði (!!??) og svo sagði konan að það væri sko allt í lagi ef smá "kúkaspörð" kæmu í hita leiksins því ljósmæðurnar væru snillingar í að fjarlægja þau svo lítið beri á. Ekki fannst mér þetta nú sannfærandi. Hvað ef maður fær sprengiræpu? Það yrði nú ekki kósí. Fórum í heimsókn á fæðingardeildinna að skoða allt. Hlakka mikið til að prufukeyra glaðloftið sem konan hvatti verðandi foreldra til að nota óspart. Sem sagt, það er allt frekar boring og heilbrigt að frétta bara. Vildi bara láta vita af mér krakkar mínir.
3/09/2005 06:56:00 e.h.
sunnudagur, mars 06, 2005
![](http://cim.ucdavis.edu/clubs/SPSR/miss-busy.gif) Það er allt brjálað að gera maður. Svona a.m.k. miðað við það að ég er með sísparkandi og iðandi barn inni í mér og orðin rosalega feit, bólgin og bakveik. Vegna þessara líkamlegu annmarka starfa ég nú á 30% afköstum og því er í raun 70% meira að gera en venjulega...eða eitthvað. Stærðfræði hefur aldrei verið mín sterkasta hlið. Sem kemur niður á mér núna því ég á að vera að gera einhverja rosalega fagmannlega kennsluáætlun um það hvernig ég ætla að kenna 20 grunnskólabörnum stærðfræði með meiru í tvær vikur í apríl. Ég gæti alveg bullað eitthvað á no time og komist upp með það en þetta er hópverkefni sem tekur endalausan tíma, vangaveltur, hitting og kjaftagang. Svo erum við að fara í helgarferð til Prag 18. mars ef ég get reddað mér læknisvottorði um að ég megi fljúga. Árshátiðin í fyrirtækinu hans Hannesar verður haldin þar og ég vil ekki vera útundan. Svo var ég jafn vel að pæla í að halda afmælispartý fyrir Hannes í lok mánaðarins. Samt tókst mér að baka speltvefjur úr Grænu kostabókinni í kvöldmatinn. Þær bragðast eins og flatkökur. Næst kaupi ég bara flatkökur.
3/06/2005 12:59:00 f.h.
miðvikudagur, mars 02, 2005
![](http://www.simnet.is/bernes/teacher.jpg) Grunaði ekki Gvend. Krakkarnir voru greinilega með einhverja sparihegðun í gær en nú þegar þau eru farin að venjast okkur eru þau líkari því sem ég hafði ímyndað mér. Enda kemur á daginn að þau eru nánast flest á lyfjum eða að bíða eftir greiningu. En ég mun ekki segja neinar krassandi skólasögur hér því kennarar, foreldrar eða nemendur gætu uppgötvað bloggið, lagt saman tvo og tvo og fengið út 18.
3/02/2005 12:00:00 f.h.
þriðjudagur, mars 01, 2005
![](http://www.gulfcinema.com/images/kids.gif) Ég er alveg búin á því. Er þessa vikuna ásamt fleiri kennaranemum í heimsókn í grunnskóla og er engan veginn að nenna því. Þetta eru samt rosalega stilltir og dúllulegir 12 ára krakkar (furðulegt - ég hélt að nútímabörn væru öll óalandi og óferjandi, ofvirk og lesblind með með athyglisbrest og hegðunarröskun) en ég er bara orðin svo góðu vön þar sem ég hef undanfarnar vikur í skjóli læknavottorðs getað lagt mig á klukkutíma fresti yfir daginn. Ég var búin að brjóta heilann heilmikið um það hverju ég ætti að svara þegar krakkarnir færu að spyrja mig út í óléttuna. Var alveg viss um að þau myndu benda á mig flissandi og spyrja hvort ég hefði verið að ríða. En þau voru hin mestu prúðmenni. Ég gruna þau samt um græsku. Eftir páska kennum við þeim í tvær vikur og ég held að þau séu að spara sig þar til "alvöru" kennarinn lætur sig hverfa. En þá er bara að vona að ég að missi legvatnið snemma og sleppi við kennsluna.
3/01/2005 01:06:00 f.h.
|
|
|
|
|