|
|
Jafnvel hinn minnsti froskur er mikill í sínum eigin forapolli
|
|
| |
|
|
| |
|
|
|
|
|
| |
mánudagur, júní 30, 2003
26 ára afmælið á föstudaginn og útlitið á ógnarhraðri niðurleið með aldrinum og aukinni útivist. Ég sem hef skrópað í leikfimi, glápt alsæl á sjónvarpið og troðið í mig snakki og nammi í öll þessi ár án þess að það sæist högg á vatni. Nú er ég búin að þyngjast um 7 kíló síðan um áramótin. So no one toooold you life was gonna be this wayyyyyyyyyayyyy. Djöfulsins helvíti! Kellingalínurnar og fellingarnar troða sér upp og út um allt og undirhakan sem eitt sinn var dúllulleg er nú hrollvekjandi. Maður áttar sig ekkert á þessu fyrr en allt er um seinan. Þetta væri svo sem allt í lagi ef ég ætti föt í einni stærð fyrir ofan, en það er svo skelfilegt eitthvað að geta ekki rennt upp buxunum og sjá bumbuna leka niður úr þröngu bolunum. Þetta er svo vonlaust eitthvað. Ég var í tvo tíma í Hagkaup áðan að skoða heilsurekkana. 5 lítra dunkar af prótínduftum, 300 kr. orkustengur sem eru minni er Þristar og Kókos. 4 pínulítil lífrænt ræktuð epli í bakka á sama verði og 20 skordýraeiturshúðuð girnileg hormónaepli frá U.S.A. Ekki það að epli geti verið girnileg...phútúí. Ég lét undan og keypti helling af rándýru grænmeti og hélt upp á það með því að kaupa mér gráðostaborgaratilboð með stækkuðum skammti af frönskum og pepsíi og kokkteilsósu. Ég nenni ekki að standa í þessu, hef ekki efni á heilsufæði og líkamsræktarstaðir hræða mig. Áður en ég gríp til slíkra örþrifaráða ætla ég gera eina tilraun enn til þess berjast við skrímslið á minn hátt. Að sofa. Á morgun ætla ég nefninlega að kaupa töflur sem ég sá auglýstar í Heilsuhúsinu sem brenna kolvetni og drasli á meðan maður sefur. You'll see.
6/30/2003 11:37:00 e.h.
fimmtudagur, júní 26, 2003
Detti mér nú allar dauðar lýs úr höfði!! Dave Grohl bara á leiðinni til landsins!!!! Ég er svo aldeilis hlessa! Nú verður gaman.
Engin tími til að blogga, er ar stelast í vinnunni....en endilega kíkið á þessa síðu ykkur til skemmtunar.
6/26/2003 11:01:00 f.h.
miðvikudagur, júní 25, 2003
You're nothing, really. But you're nice.
What type of music are you?
brought to you by Quizilla
6/25/2003 04:38:00 e.h.
þriðjudagur, júní 24, 2003
Sumarið dregur greinilega úr bloggþörf en hún hlýtur að koma aftur með lækkandi sól. Helgin var æði takk fyrir. Geðveikt veður og mér er hætt að finnast leiðinlegt á kajak. Við kajökuðumst allan daginn á spegilsléttum sjó og töluðum við fuglana og selina....eða sko bara einn sel.
Lundar eru núna uppáhalds fuglarnir mínir. Þeir eru geðveikt fyndnir og mér finnst mjög aumingjalegt af íslenskum karlmönnum að vera að veiða þessa litlu hlunka. Sömu sögu er að segja um rjúpuna. Það er nákvæmlega ekkert macho við það að veiða fugla sem geta ekki einu sinni flogið almennilega. Svona dó Geirfuglinn út. Djöfulsins hálfvitar.
Við fórum í land á einhverri eyðieyju og ætluðum að leggjast í grasið og fara í sólbað. Það var ekki hægt og ekki heldur hægt að labba neitt um á eyjunni því hún var öll sundurgrafin. Þetta voru svona Lundaholur sem þeim tekst einhvern vegin að grafa og tengja saman eins og moldvörpugöng. Ótrúlega flott! Ég hafði aldrei séð svona áður og ef Hannes hefði ekki verið með mér hefði ég örugglega haldið að þetta væru göng eftir óþekkta dýrategund sem hefði farið huldu höfði og numið land á eyjunni....eða bækistöð geimvera....ég held alltaf að allt sem ég ekki skil sé komið frá geimverum. Anyway...þar sem við gátum ekki lagst í grasið lagðist Hannes bara í fjöruna en ég harðneitaði því hún var öll morandi í einhverjum litlum pöddum. Hannes fussaði bara og sagði að pöddurnar hefðu engan áhuga á mönnum sem afsannaðist þegar þær þöktu hann á nokkrum sekúndum. Hann lét sér þó ekki segjast, lá bara áfram og dustaði þær karlmennskulega af sér þegar hann gafst loksins upp. Þar sem ekki er baðaðstaða í Flatey svaf ég í öðru rúmi eftir þetta. Hannes kenndi sér þó einskis meins en það hefði getað farið verr því þegar ég sagði frá ævintýrum helgarinnar í leikskólanum frétti ég að lundar væru með lýs á sér sem boruðu sig inn í húðina og verptu eggjum. Þessu til staðfestingar fann eftirfarandi á netinu:
"Ef maður gengur um eða sest í lundabyggð stutta stund þá er hún fljót til og eftir ótrúlega skamma stund þá verður viðkomandi morandi í litlum sprækum kvikindum sem bíta til blóðs.Síðan hefst veislan hjá lúsinni, hún sýgur til sín blóð og stækkar margfallt, safnar í sig blóðforða þangað til hún er orðin að stórum blóðbelg með litla fætur."
Íííííííííííjú!!!! Ég hefði aaaaaaaaaaaldrei farið á land hefði ég vitað þetta. Ég held að við séum þó ekki orðnir hýslar fyrir lundalýs en mér er samt ekkert voðalega rótt. Þessi umræða á leikskólanum leiddi til þess að farið var að ræða alls kyns aðrar ógeðissögur. Verst fannst mér að heyra sögu af ónefndri kexverksmiðju sem á víst að vera verndaður vinnustaður. Sögumaðurinn á vinkonu sem var þar verkstjóri og kom að einum starfsmanninnum þar sem hann var að sleikja kremið í kremkexinu áður en hann setti það saman. Þessi saga ber öll merki þess að vera flökkusaga......en samt.......
ps: Ef þið viljið ættleiða lunda er það hægt á þessari síðu
pps: hvort á að segja í land eða á land?
6/24/2003 08:19:00 e.h.
föstudagur, júní 20, 2003
Bara að láta vita að við erum að flýja úr bænum svo hér verður engin hreyfing fyrr en eftir helgi. Fólkið á móti er að láta skipta um þak hjá sér svo hér er óbærilegt að vera og förum við því í kajakferð til Flateyjar í Breiðafirði. Við siglum ekki á kajökunum þangað samt.....við förum með Baldri sko....ætlum bara að sigla svona rómó í kringum eyjuna. Það vildi nefninlega enginn koma með okkur svo við verðum bara tvö. Bæ. Góða helgi.
6/20/2003 12:30:00 f.h.
miðvikudagur, júní 18, 2003
Jæja....blogga....hmmmm. Langar nú ekkert að blogga nema þegar ég er í góðu skapi en hver veit hvenær það verður. Ég er nefninlega að drepast í rófubeininu síðan ég datt á skíðum fyrir tveimur árum, að drepast í löppinni síðan ég klessti á vegginn á vespunni um daginn, að drepast í tönninni því það er einhver afgangsvír laus síðan ég var með teina og það er ekki laus tími hjá tannlækninum fyrr en 20 ágúst....og svo komst ég ekki inn í Kennaraháskólann. Hvað gera bændur nú? Ég veit það ekki. Ég gæti kannski farið að plana brúðkaupsferð til Tahiti eftir áramót, en þá þarf ég víst að giftast. Ætli Hannes sé ekki bara hættur við að giftast mér. Við erum búin að vera trúlofuð í nokkur ár og hringarnir dúsa ofan í skúffu því þeir eru óþægilegir. Jóhanna og Spörri ætla víst að vera á undan okkur sem er svindl því við erum búin að vera saman fimm sinnum lengur en þau. Oh well. Þetta kemur allt í ljós.
Ég er samt búin að gera eitt svolítið skemmtilegt síðan ég bloggaði síðast. Ég sá Gullfoss og Geysi í fyrsta sinn. Það var rosa flott en allir þessir bandarísku túristar hefðu mátt missa sín. Við vorum meira að segja í bráðri lífshættu þarna á hverasvæðinu. Það var svona band til að halda fólki í burtu allt í kringum Geysi sjálfan svo maður sá hann eiginlega ekkert. Pabbi Hannesar sagði að það væri allt í lagi að stelast yfir og kíkja því hann væri löngu hættur að gjósa. Við gerðum það og stóðum alveg á brúninni á meðann skelfingu lostnir túristarnir hristu höfuðin. Við vorum ekki fyrr komin til baka en hann byrjaði bara allt í einu að frussast og gjósa!!!!...eða svona hálfgjósa sko....allavega frussast út um allt. Við hefðum sko soðnað ef hann hefði byrjað nokkrum mínútum fyrr. Verrí deingerööss sko. Svo keyptum við geðveikt gott lífrænt ræktað grænmeti og handmálaða steinuglu í garðinn á leiðinni aftur í bústaðinn sem mamma og pabbi Hannesar voru að leigja. Þetta var sko almennilegur bústaður með sjónvarpi, vídeói, potti og síðast en ekki síst nýja Trivialinu og Partýspilinu. Þetta var líka í fyrsta sinn sem ég prófaði Partýspilið og það var svo gaman að ég pissaði næstum í mig. Viti menn ég er bara næstum komin í gott skap við tilhugsunina! Pant fá svona spil í ammmmlisgjöf!!!
6/18/2003 11:52:00 e.h.
fimmtudagur, júní 12, 2003
Get ekki bloggað. Er úrvinda eftir að hafa reynt að hætta að drekka kók. Var búin að vera með mígreni í tvo sólarhringa og hélt að ég væri að breytast í uppvakning svo ég fór að hella í mig aftur. Er á þriðja lítranum og er hægt og bítandi að vakna til meðvitundar. Ég ætla ekki að reyna þetta aftur fyrr en í sumarfríinu, það er ekki hægt að vinna í kóklausu ástandi. Djöfulsins eiturvatn.
KÓK !! (Engin furða að það bragðist svona vel):
Í mörgum bandarískum fylkjum hefur vegalögreglan 10 lítra af kóki í bílunum hjá sér til að þrífa blóð af vegunum eftir umferðarslys.
Þú getur sett T-Bone steik í skál af kóki og hún verður horfin eftir 2 daga.
Til að hreinsa klósettið: Helltu einni dós af kók ofan í klósetið, bíddu í klukkustund og sturtaðu svo niður. Sýran í kókinu leysir upp bletti.
Til að fjarlægja ryðbletti af krómstuðurum: Dýfðu krumpuðum álpappír í kók og nuddaðu stuðarann.
Til að hreinsa batteríið í bílnum: Helltu einni dós af kók yfir batterí tengslin
Til að leysa ryðgaðan bolta (skrúfu). Rennbleyttu tusku með kók og haltu henni á boltanum í nokkrar mínútur.
Til að fjarlægja fitubletti úr fatnaði: Helltu einni dós af kók í þvottavélina bættu við þvottaefni og þvoðu eins og venjulega. Kókið hjálpar
til við að leysa upp fitublettina.
Kók hreinsar framrúðuna á bílnum þínum vel.
Virka efnið í kók er phosphoric acid.
Ph í kók er 2.8. Það getur leyst upp nögl á ca fjórum dögum.
Til að flytja Coca-Cola sýrópið þurfa vöruflutningabifreiðarnar að hafa viðvörunarskilti sem venjulega eru notuð við flutninga á MJÖG ÆTANDI EFNUM.
Dreifingaraðilar Coca-Cola nota gosdrykkinn til að hreinsa vélarnar í trukkunum hjá sér.
Langar þig enn þá í flösku af hressandi kók?
6/12/2003 11:03:00 e.h.
miðvikudagur, júní 11, 2003
Hæ.....bara svona rétt að láta ykkur vita að ég er algjöööör lúði. But I guess you knew that already. Ætli ég verði ekki að segja ykkur hvað gerðist. Í gærkvöldi fórum ég og Hannes að skila vídeóspólum á vespunni hans Hannesar. Hannes keyrði því ég er ekkert alltof klár á henni. Þegar við vorum búin að skila spólunum fórum við aðeins fyrir utan staðinn sem að Hannes er að vinna á því hann þurfti að ná í einhverja lykla. Ég beið fyrir utan, leiddist og ákvað að prófa vespuna. Skemmst er frá því að segja að ég gaf óvart í botn og klessti beint á húsvegg. Hannes var kominn út svo hann sá þetta áhættuatriði sem og einhverjir töffarar í bíl sem áttu þarna leið hjá. Eins og sönnum karlmönnum sæmir hópuðust þeir allir í kringum vespuna að skoða skemmdirnar á meðan ég lá óvíg eftir á gangstéttinni. Það var svo sem ágætt, ég skammaðist mín svo mikið að ég hefði helst af öllu viljað hverfa. Hannes var þó mjög umhyggjusamur eftir að heim var komið en hló sig í svefn um nóttina. Ég var svolítið hölt í dag en er bötnuð núna, bara með nokkra marbletti og rispur og ónýtan jakka. Ég hefði átt að hlusta á mömmu, hún hefur alltaf bannað mér að koma nálægt mótorhjólum. Mömmur manns vita alltaf best, þær vita hversu miklir lúðar börn þeirra geta verið.
Ætli ég reki mig nú ekki aftur á bak í gegnum helgina sem endaði svona illa: Ástæðan fyrir því að við þurftum að skila svona mörgum vídeóspólum var að hryllingsmyndakvöld no. 2 var haldið hér á Þórsgötunni um Hvítasunnunóttina. Þetta er skemmtilegur siður sem við höfum tekið upp ásamt "litlu" systkinum mínum þremur. Þá er stofan gerð draugaleg, dýnur dreifðar um gólf, orkudrykkir þambaðir og poppað í bala. Myndirnar að þessu sinni voru: Bad taste, Evil dead, Texas Chainsaw Massacre ogThe Return of the Killer Tomatoes . Afar gaman. Gunnar Hansen stóð sig með prýði í Texas en setningar kvöldsins komu frá George Clooney í Killer Tomatoes...: "That's the bravest thing I've ever seen a vegetable do" og Peter Jackson í Bad Taste:..."I'm a Derek, and Derek's don't run!".
Á laugardeginum lenti ég svo óvænt í fjallgöngu. Sæma datt í hug að klífa Esjuna og Hannesi fannst það æði. Mér fannst það ekki og tók Bryndísi með svo ég yrði ekki eini auminginn en svo vorum við bara engir aumingjar. Við strunsuðum upp fjallið þar sem við skáluðum í bjór og grilluðum pulsur og smákökur. Síðan skokkuðum við niður. Ferðalagið tók fimm tíma og mér fannst það rosalega gaman þar til að ég kom heim. Þá leið mér eins og ég hefði orðið undir lest, svaf í sólarhring og missti af tveimur innflutningspartýum sem ég var boðin í.
Nú kveð ég en set hér að lokum inn nokkrar myndir úr göngunni:
lagt af stað
Hannes og Sæmi í Star Wars leik
Hannes nær toppnum
Ég næ toppnum
Skálað á toppnum
Íslandsmet í að baka smákökur í mikilli hæð
Sæmi hlýjar Hannesi
Við Hannes reynum nýjar leiðir í fjallaklifri
og Sæmi fær hæðarbrjálæði á niðurleið
6/11/2003 01:27:00 f.h.
föstudagur, júní 06, 2003
Það er orðið deginum ljósara að skordýramafían er að reyna að flæma okkur út af eigin heimili og í tíu hæða blokk. Ég hef sem sagt ekki unnið sigur á hveitibjöllubófunum og þeir alhörðustu eru enn að ögra mér hér og þar þrátt fyrir heimsókn meindýraeyðisins. Ekki nóg með það, heldur hafa þeir nú kallað út liðsauka. Þeir hafa greinilega einhver sambönd við graslirfugengið því nú er það mætt hingað í garðinn og er að rústa þessum tveimur trjám sem garðurinn okkar skartar. Garðurinn okkar er reyndar í einhverri þeirri mestu órækt sem sést hefur en mér finnst það bara kúl og allt í lagi enda höfum við þessi tvö risatré, lítinn pall, afhögginn stöðumæli (löng saga) og útigrill til þess að státa okkur af. Svo eigum við líka bara 20% í garðinum og kunnum ekki við að fara í nágrannaerjur við celebrityið sem býr á móti (nefni engin nöfn en hann fitlar oft við hárið á sér þegar hann er að hugsa í sjónvarpinu). Hann þrífur aldrei hundakúkinn og lyktin tekur fagnandi á móti manni þegar maður kemur heim og jæja nevermind. Það sem ég vildi sagt hafa er að hægt og hljóðlega hafa meindýr verið að éta trén án þess að við tækjum eftir því. Ég sá eina sæta graslirfu síga niður úr trénu um daginn þegar ég var á leiðinni út og færðist þá yfir mig bros vegna fegurðar náttúrunnar. Það bros breyttist fljótt í hryllingsgrettu þegar ég sá að hún var ekki ein á ferð heldur voru hundruðir af grænum iðandi viðbjóðum að dingla sér úr laufblöðunum og á laufblöðunum sjálfum voru einhverjar aðrar óþekktar svartar boðflennur. Ég hljóp skrækjandi á brott og hringdi undir eins í garðaúðunargaur. Svo skemmtilega vildi til að ég hitti á einhvern garðyrkjugaur sem ég hafði tekið viðtal við í fyrra fyrir Rás 2. Viðtalið var um lata garðeigendur...hvað hægt væri að gera til að lappa upp á garða í órækt svo þeir líti skár út og var tekið í mínum eigin garði. Ég viðurkenndi skömmustulega að ég hefði ekki gert nokkurn skapaðan hlut í garðinum síðan þá. Hann vildi endilega veita mér einhverja ráðgjöf en ég afþakkaði hana og sagði honum bara að koma með öflugasta eitrið sitt, stráfella moððerfokkerana og senda mér svo gíróseðil. Það gerði hann í dag og nú hangir miði á trjánum sem varar fólk við því að vera á ferli í garðinum næstu daga. KÚL!!!! Hafiði þetta skordýravibbar!!!! Við förum hvergi!!!!!!
6/06/2003 12:26:00 f.h.
fimmtudagur, júní 05, 2003
Ég fékk afar einkennilegt SMS í dag:
Fyrirgefið, en eruð þér umhverfissinninn á.f.? Vinsamlegast hafið samband.
Ég sendi skilaboð til baka og spurði hver þetta væri og fékk þá þetta svar:
Vinn gjarnan að málstaðnum, tala og skil þýsku.
Ég sagði viðkomandi að hann væri nú örugglega eitthvað að villast og hef ekkert frétt síðan. Mínútu síðar hringdi svo einhver maður og spurði hvort pabbi minn væri heima. Mjög undarlegt allt saman. Ætli ég sé orðin flækt í einhver alþjóðleg umhverfishryðjuverkasamtök? Hver er umhverfissinninn á.f. ? Hvað er á.f. ! ? Hver þérar nú til dags ! ! ? Veit ekki hvort ég get sofið í nótt af spenningi.
6/05/2003 12:20:00 f.h.
miðvikudagur, júní 04, 2003
 I am a Thrust-ship.
I am small and tricky - where you think I am, I probably am not. I can work very fast, but I tend to go about things in a round about way, which often leaves me effectively standing still. I hate rocks. Bloody rocks. What Video Game Character Are You?
|
6/04/2003 12:29:00 f.h.
mánudagur, júní 02, 2003
Jæja ju minn eini mánudagur bara, þá er nú hefð fyrir því að rifja upp helgina. Látum oss sjá:
Fór í sveitaferð með leikskólanum á föstudaginn. Það var mikið stuð. Belja reyndi að éta mig og páskaungi kúkaði í hendina á mér.
Diskókeila á laugardagskvöldið með Hannesi , Bryndísi og Ásgeiri. Ég fimmfaldaði skortölu mína frá síðustu keiluferð en varð þó í næstsíðasta sæti. Ég er búin að komast að því að ég hitti engar keilur nema ég sé mjög reið þegar ég kasta og það er sko ekki erfitt þegar Hannes er með í för að skipta sér af og reyna að "kenna" manni að keila. Svo langaði mig nú bara að fara að sofa en Bryndís dröslaði okkur um bæinn í leit að stuði sem ekki fannst. Eyddum klukkutíma í þá hálfvitalegu iðju að bíða í röð fyrir utan Sirkus. Þar var einhver gella að segja okkur hversu frábært henni fyndist að Björk hafi einu sinni beðið í röðinni fyrir utan Sirkus eins og allir hinir. Gellan hafði ekki fyrr slept orðinu en hún áttaði sig á því að hún þekkti dyravörðinn og tróðst med det samme fram fyrir alla í röðinni. Hámark hræsninnar.
Á sunnudaginn brunuðum við Hannes, Sæmi, Sigrún og Erla til Grindavíkur að heimsækja Óskar vinnufélaga Hannesar, konu hans, fallegt barn og forljótan kött. Það var svaka gaman, steikjandi hiti, sveita-og sjávarblíða. Við fórum í leikfimiskeppni á garðpallinum og rifjuðum upp handahlaup, arabastökk, hjólbörur og brú. Síðan löbbuðum við niður á bryggju þar sem í gangi var heljarinnar hátíð í tilefni sjómannadagsins. Þar keypti ég grænan candy floss og risastóra Bubba Byggir gasblöðru. Hún svífur nú um í stofunni and keeps me company á meðan Hannes er í vinnunni. Kíktum í Bláa lónið á leiðinni heim, grilluðum kjúlla og skemmda sveppi og grjótsofnuðum yfir vídeómynd.
Mig grunar að vinnuvikan verði ekki eins ljúf og helgin. Leikskólastjórinn búinn að segja upp og allt í rugli. En það er önnur saga sem ekki verður sögð hér. Ég ætla að fara niður að leggjast fyrir í sófanum því er að drepast úr harðsperrum eftir leikfimiskeppnina. Bæ
6/02/2003 09:47:00 e.h.
|
|
| |
|
|
|
