sunnudagur, febrúar 27, 2005
Nýr dagur, ný líkamsbreyting. Nú eru puttarnir mínir orðnir svo feitir að ég varð að setja giftingarhringinn í keðju og hafa hann um hálsinn. Hefði átt að fá mér brúðkaupshúðflúr eins og ég ætlaði mér. Í óléttunni hafa gömlu tattúin mín líka öðlast nýtt gildi. Ég hef uppgötvað að undirliggjandi rót húðflúrsásetningar hlýtur í mörgum tilfellum að vera þörf fólks til þess að hafa stjórn á líkamanum. Því eins og hún Unnur sagði í kommenti hér einhvers staðar fyrir neðan þá er kroppurinn engu minna ógnvænlegt fyrirbrigði en ókannaður algeimurinn.
2/27/2005 04:58:00 e.h.
laugardagur, febrúar 26, 2005
Ég er í svo mikilli tilvistarkreppu varðandi pottaplöntur. Málið er ekki að þær drepast hjá mér heldur að þær drepast of hægt. Hér er allt fullt af forljótum pottaplöntum sem ég hef ekki samvisku í að henda því þær eru lifandi. Þær aflagast, visna á köflum, vaxa í vitlausar áttir o.sfrv. Hvað gerið þið? Hendið þið lifandi plöntum bara beint í ruslið? Það er örugglega voðalega vont karma. Maður gæti líka óvart hent blómálfum. Hér er ein sem er fín er hún er að vaxa upp úr pottinum og ég skil ekki alveg umpottunarkerfið. Á maður bara að kaupa stærri potta endalaust? Hvar endar þetta? Ég vil ekkert fullt hús af risavöxnum plöntum. Og ef maður kaupir stærri potta passa plönturnar ekki lengur í gluggakisturnar og það verður að færa þær eitthvað annað. Ég vil ekkert setja þessa í stærri pott. Hún er í stórum potti. Risastórir pottar eru ógeðslega dýrir og þá þyrfti ég líka að finna nýjan stað fyrir hana og þá þyrfti ég að kaupa nýja plöntu á gamla staðinn o.s.frv. Þetta er martröð!!!!!!!!!!! Og ekki ráðleggja mér að kaupa gerviblóm. Þau eru svo gervileg. Svo brýtur Ella eðla alla skrautmuni. En reyndar étur hún pottaplönturnar líka. Æ þetta er svo vonlaust eitthvað.
2/26/2005 04:07:00 e.h.
Ella eðla er EKKI í náðinni þessa stundina. Fyrir nokkru klifraði hún upp í gluggakistu og braut skelina á skjaldbökulampa sem var í miklu uppáhaldi hjá mér. Ég þurfti að fara í nokkrar búðir til þess að fá nýja skel en hún var ekki eins flott á litinn og sú gamla svo ég fór í föndurbúð, keypti glermálningu og eyddi miklum tíma og fyrirhöfn í að ná henni í akkúrat réttum lit. Það tókst og fullkomið jafnvægi heimilis og hugar náðist. En í morgun vaknaði ég við brothljóð... Ég er að reyna að líta á þetta sem þolinmæðisæfingu fyrir foreldrahlutverkið en núna er samt góður tími til þess að semja við okkur um eðlukaup ef einhver hefur áhuga.
2/26/2005 02:57:00 f.h.
föstudagur, febrúar 25, 2005
Ég er með miklu betri hugmynd en að rífa niður gömlu húsin við Laugaveg: Rífa niður húsin við Hverfisgötu og byggja þar. Breyta síðan Laugaveg, Hverfisgötu og hliðargötunum á milli í göngugötur, setja glerþök og hitara á nokkrum köflum og rýmka götuskemmtaraleyfi. Vandamálið úr sögunni. Oh hvað er stundum erfitt að vera svona klár og hafa engin völd.
2/25/2005 02:46:00 f.h.
fimmtudagur, febrúar 24, 2005
Obbossí. Það getur verið svolítið dýrt að fara út að labba. Fór óvart í Pennann þar sem var óvart útsala svo ég keypti óvart fullt af bókum sem ég hef örugglega ekkert að gera við. En það er gaman að horfa á þær. Svo var líka 75% afsláttur. Það er ekki hægt að standast slík gylliboð. Keypti: Bakað úr spelti, Aftur í form: 10 vikna endurhæfing fyrir nýbakaðar mæður, Artemis Fowl, Jói og risaferskjan, tvær viðskiptabækur handa Hannesi: How to become a great boss og Minimise stress, maximise success og dáleiðsludisk til þess að nota við barnsburðinn: Minni verkir, meiri vellíðan. Nú vantar mig bara svona hvernig-á-að-hætta-að-eyða-pening-í-vitleysu bók.
2/24/2005 08:32:00 e.h.
miðvikudagur, febrúar 23, 2005
Það er ýmsum vandkvæðum bundið að skipta yfir í heilsusamlegra fæði. Nú fer ég alltaf í Nóatún svo ég þurfi ekki að vaða í gegnum snakk, nammi og súkkulaðikexstafla til þess að komast að 3. flokks grænmetinu á síðasta séns sem þeir selja í Bónus. Dýrara já, en róandi. Minna að gera og lyftutónlist í lofti. Keypti þorsk með sólþurrkuðum tómötum og hvítlauk í fiskborðinu sem virðist hafa lekið, fyrst á kassafæribandið (hélt að það væri eftir annan viðskiptavin) og síðan út um allt í pokanum. Þegar ég kom heim komst ég að því að öll matvælin voru olíuborin, slímug og lyktandi af fisk og hvítlauk. Ég sá ekki annað í stöðunni en að þvo allt í vaskinum með vatni og uppþvottalegi en gætti ekki að því að göt voru á sumum umbúðum og nú er sápa í spínatinu mínu. Erfitt líf.
2/23/2005 07:18:00 e.h.
Hmmmmm...spúkí svona vírusar. Ég held að það hafi einn verið að gera smá óskunda í tölvunni minni. Allt í einu eru allar þær síður sem ég hef sett í favorites í gegnum tíðina horfnar. Það undarlega er að ég varð ekkert reið heldur færðist yfir mig svona frelsistilfinning. Eins og ef einhver myndi brjótast inn í geymsluna mína og fara með allt draslið í Sorpu. Ég yrði bara laumufegin yfir öllu nýja plássinu. Ég myndi aldrei tíma að gera það sjálf þótt ég muni ekkert hvað ég er að geyma eða til hvers. Ég er búin að vírushreinsa núna en það hefði verið fínt ef eitthvað meira hefði horfið. En ekki bloggið. Þá yrði ég foj. Vó, hvaðan kom þetta! Ég hef aldrei notað orðið foj áður á ævinni. Er það alvöru orð? Hver er uppruni þess?
2/23/2005 02:54:00 e.h.
Nýjar bumbumyndir komnar inn á barnalandssíðuna. Naflaklóin sést þó ekki. Talandi um myndir þá fékk ég þessa líka ljómandi fínu mynd senda í tölvupósti í dag. Takk Hulda:
2/23/2005 05:14:00 f.h.
þriðjudagur, febrúar 22, 2005
Djöfull er þetta frábært þokuveður maður! Það er svo róandi. Svona ætti þetta að vera oftar, eiginlega bara alltaf nema á sumrin. Eins og heimurinn sé ekki til nema í nokkurra metra radíus í kringum þig. Svo er bara einhver tölvuleikjahöfundur sem teiknar umhverfið jafnóðum eftir því sem þú labbar lengra. Ætla að fara út að labba með bumbuna í kvöld. Best að vera vopnuð samt. Það gætu leynst glæpamenn í þokunni. Og svona trylltar óbyrjur sem vilja skera gat á bumbur og ræna börnum. Annars er ég farin að halda að ofsóknarbrjálæði fylgi óléttu. Það kom maður að skipta um hitaveitumæli í gær en ég er enn þá viss um að hann hafi verið að koma fyrir njósnabúnaði.
2/22/2005 07:19:00 e.h.
Ég fann ekkert um þetta fyrirbæri á netinu. Herti upp hugann og klippti þetta af hvað sem það var. Líktist eðlukló. Það er samt smá eftir. Ætli þetta vaxi ekki bara aftur.
2/22/2005 02:43:00 f.h.
mánudagur, febrúar 21, 2005
Nú getur þessi helv... ólétta og þær líkamsbreytingar sem henni fylgja bara hoppað upp í rassgatið á sér. ÞAÐ ER FARIN AÐ VAXA NÖGL ÚT ÚR NAFLANUM Á MÉR!!!! ...Eða einhver andskotinn. Ég er alla vega búin að líma plástur fyrir naflann svo ég þurfi ekki að horfa á hann.
2/21/2005 01:52:00 f.h.
sunnudagur, febrúar 20, 2005
Það er ekkert smá fyndið að fara út á lífið með svona stóra bumbu. Á föstudaginn fórum við á tónleika með indverskri gleðitónlistarhljómsveit. Svaka dillibossastuð og ég ætlaði að dilla bumbunni í góðum fíling en þá var mér bara boðið sæti eins og gamalli konu í strætó. Ég kunni ekki við annað en að þekkjast boðið en það var þó ekki nærri því eins gaman að dilla sér sitjandi. Á laugardagskvöldið var afmæli og indverskur matur hjá Hákarlastelpunni . Gestirnir fóru á 22 eftir teitið og voru þar fram eftir morgni. Ég drakk sódavatn með lime, ímyndaði mér að það væri baccardi límon og fann engan mun. Klósettferðirnar voru athyglisverðar. Ég fékk forgang í röð og fólk talaði einhvern veginn svo krúttulega við mig. Venjulega eru ókunnugar stelpur svolítið bitchy við mann á klósettinu og strákarnir reyna við mann (hefur að vísu snarminnkað svona í seinni tíð) en engum stafar ógn af óléttri gellu og fólk verður því afslappað og indælt aldrei þessu vant. Þetta var fínt en mér leið samt svolítið eins og ég væri þroskaheft og fjölfötluð nunna. Eins gott að þetta færist í venjulegt horf eftir barnsburðinn. Annars fer ég beinustu leið og fæ mér einkaþjálfara, gervineglur og glyðruleg föt.
2/20/2005 06:20:00 e.h.
miðvikudagur, febrúar 16, 2005
Já já já, það er alveg ýmislegt að gerast þótt það sé kannski ekki allt eitthvað voðalega mikið fjör og glamúrus neitt. Fullt af hópverkefnum í stærðfræði og heimboð til gamalla vinkvenna sem skiptast á því að hræða úr mér líftóruna með hrottalegum fæðingarsögum og svona. Svo vorum við með næturgesti í gær en þar voru á ferðinni verðandi stjörnur raunveruleikaþáttar sem hefur göngu sína á Skjá einum í mars. Þau máttu ekki koma heim til sín í sólarhring og vantaði samastað. Lesa má nánar um ævintýri þeirra hér. Þau völdust víst til leiks í þættinum vegna þess að þau eru einstakir sóðar og afskaplega lítið fyrir tiltekt. Einu sinni lánaði ég þeim tösku sem var skilað marineraðri í kattahlandi. En bera má í bætifláka fyrir þau vegna þess að þau eru bæði í rokkhljómsveitum. Ástæða þess að ég er ekki í rokkhljómsveit er t.d. einungis sú að ég er alltaf svo mikið að taka til.
2/16/2005 05:41:00 e.h.
sunnudagur, febrúar 13, 2005
Hvernig er það. Á ekki að bjóða upp á neitt spennandi í eftirjólamillihátíðaskammdeginu? Mér finnst bara ekkert um að vera í lífinu. Engar spennandi uppákomur eða tónleikar í boði. Allir bara að kjafta eitthvað. Allt of mikið af talmiðlum. Maður er bara alveg orðinn ruglaður og nær ekki að mynda sér sína eigin skoðun á nokkrum sköpuðum hlut. Aðrir eru alltaf fyrri til. Hvar er tónlistin? Ég fór meira að segja í græna glimmersokka í morgun til þess að krydda tilveruna en ekkert gekk.
Anyway, ég mæli alla vega ekki með því við við neinn að eyða laugardagskvöldi í að rúnta um Grindavík. Ég man ekki eftir því að hafa nokkurn tíman leiðst eins mikið.
Einnig vara ég við Eldsmiðjupizzunum þessa dagana. Kannski eru þeir að þjálfa nýja pizzubakara eða eitthvað en pizzunum hefur alla vega hrakað í gæðum. Hins vegar mæli ég eindregið með karamellupistasíumarsípanhringjum frá Jóa Fel.
Svo verð ég að segja eina litla sögu af því hvað ég á yndislega mömmu. Hún er lasin svo ég ákvað að fara með einn karamellupistasíumarsípanhring til hennar. Nú er það svo að fólk með lélega tískuskynjun skellir sér oft í þægilega stuttermaboli sem það hefur fengið ókeypis frá fyrirtækjum eða í einhverjum happdrættisleikjum. Þekktasta fyrirbærið er fólkið sem klæðist við öll tilefni bolum merktri Íslenskri erfðagreiningu. Kallast þetta fólk í daglegu tali bolafólk. Mamma mín hefur aldrei fallið í bolafólks flokkinn. Hún er aðlaðandi og virðulegur kennari á fimmtugsaldri sem er meira að segja þekkt fyrir að vera ávalt smart í klæðaburði (a.m.k. miðað við aðra kennara ;-) ). Það gilda aðrar tískureglur þegar fólk er lasið og því kom það mér ekkert á óvart að sjá mömmu í lufsulegum stuttermabol merktum Notting Hill kvikmyndinni. En þegar hún fer að hella upp á kaffi og snýr baki í mig rak ég hins vegar upp stór augu. Stendur þá flennistórum stöfum aftan á bolnum: FANCY A FUCK!? Ég hélt að ég yrði ekki eldri. Þegar ég ætlaði að benda henni á þennan hroðbjóð vissi hún full vel af honum og var meira að segja búin að tilkynna öllu heimilisfólki (þar með talið vinum og kærustum systkina minna sem dvelja þar löngum stundum) að þetta væru hreint ekki skilaboð til þeirra. Mamma, þú ert yndisleg!
2/13/2005 05:26:00 e.h.
föstudagur, febrúar 11, 2005
Ella eðla er búin að finna sér nýjan uppáhaldsstað. Henni finnst mikið sport að liggja ofan á lyklaborðinu þannig að ef þið fáið undarlegan tölvupóst frá mínu netfangi er hann ekki endilega frá mér.
2/11/2005 01:40:00 f.h.
fimmtudagur, febrúar 10, 2005
Ég er frjáls!!! Fór til yndislegs læknis sem var sammála mér um að stigarnir í vinnunni væru mér óheilsusamlegir og hún gaf mér þetta líka fína vottorð um að ég væri óvinnufær. Nú verður lífinu tekið með ró, fjarnámið stundað, koma Bumburassar undirbúin, heilsuréttir eldaðir ofan í Hannes ásamt því sem spáð verður í framtíðina, fiktað á gítar, hugað að flutningi, drukkinn pilsner, og fleira skemmtilegt. Yfirmenn mínir voru hundfúlir við mig en ég reyni að afmá þá úr huga mér. Ég ætla hvort eð er ekki aftur á gamla vinnustaðinn eftir fæðingarorlof. Hinn almenni vinnumarkaður er of kjánalegur fyrir mig. Of mikið af súrum yfirmönnum. Planið er að gerast sjálfstætt starfandi kennari, lausablaðamaður og Kolaportsbásasölumaður. Ég mun þó ekki selja Kolaportsbása heldur skemmtilegar vörur eins og þessar:
Bacon Air Freshener
This unlikely Bacon Air Freshener is the perfect way to brighten any carnivore's day. Put one up in the family room and everyone will have a sudden craving for a BLT. Each has a handy string for hanging and measures about 4" tall.
Toast Glasses
These clever little 4" plastic glasses have a pointy stem instead of a base. Put the six glasses that come in each set on top of a cake and fill them with champagne to toast a special occasion. Stick them in blocks of cheese and fill them with wine for a wine tasting your guests will never forget. Or, you could fill them with tequila and stick them in lime wedges for a party that everyone will forget.
Svo færi ég mig náttúrulega í stærri húsnæði þegar vörurnar slá í gegn. Og svo kannski breyti ég búðinni í kaffihús og bar....og þá verður nú aldeilis gaman krakkar mínir.
2/10/2005 01:11:00 f.h.
miðvikudagur, febrúar 09, 2005
Hósta eins og andsetin væri og er komin með þvílíkar harðsperrur í bumbuna en má ekki taka neinar hóstamixtúrur. Var bara sagt að vera heima og anda að mér gufu. Gramdist það mjög því ef fólkið sem má ekki tala um á blogginu hefði drullast til að afhenda okkur húsið á réttum tíma væri ég nú með heilt gufubað út af fyrir mig.
2/09/2005 01:46:00 f.h.
þriðjudagur, febrúar 08, 2005
Ég held að það sé reimt í bílnum mínum! Var heima hjá stelpu úr skólanum að gera hópverkefni og fór ekki heim fyrr en c.a. 1:30. Strætin voru gjörsamlega auð og góða helvítis stórborgin var ansi draugaleg. Þannig er mál með vexti að litli sæti bílinn minn tekur stundum upp á því alveg sjálfur að læsa og aflæsa hurðum í gríð og erg með tilheyrandi smellum. Mér fannst það bara sætt þar til í kvöld. Stelpan sem ég keyrði heim varð viti sínu fjær af hræðslu og lét mig lofa að senda sér sms þegar...og ef...ég kæmist heim. Mér leist ekki alveg á blikuna eftir að ég var orðin ein í bílnum og reyndi hvað ég gat að líta ekki í baksýnisspegilinn. "Týpískt að þetta gerist aftur þegar ég keyri fram hjá kirkjugarðinum" hugsa ég sí svona og viti menn. Akkúrat þegar ég keyri fram hjá gamla kirkjugarðinum við Suðurgötu byrja smellirnir á fullu. Ég brá á það ráð að byrsta mig segja upphátt "Æi hættu þessu!!" og hættu þeir þá samstundis (enda var ég líka komin fram hjá garðinum). Jahá, ævintýri enn gerast krakkar mínir. Ætla að fara og setja einhverja stuðtónlist á fyrir svefninn til að ná úr mér hrollinum.
2/08/2005 01:50:00 f.h.
mánudagur, febrúar 07, 2005
Það er frekar óskemmtilegt að vera með kvef og hósta þegar maður er valtandi óléttur og pissar í sig við hnerra sem gera ekki boð á undan sér og óundirbúin hóstaköst. Systir mín hefur þó reynt að gera þessa lífsreynslu sem skemmtilegasta fyrir mig og er búin að lána mér bol með áletruninni: Sometimes I pee when I laugh.
2/07/2005 02:12:00 e.h.
laugardagur, febrúar 05, 2005
Ojojojojojojooojj hvað þetta er ömurlegt. Ég er með brjálaðan hósta og get ekki legið lárétt. Þetta er kannski öfugmæli því ekki er hægt að liggja lóðrétt en alla vega, ég er hætt að geta sofið á nóttunni. Ágætis æfing fyrir ungbarnauppeldi segja flestir. Hef ekki farið í vinnuna í viku og er ekkert á leiðinni aftur ef þetta lagast ekki. Var með samviskubit og mætti einn morguninn en fór fljótt heim í fýlu. Þegar maður er óléttur og með flensu er maður ekki alveg að höndla það þegar fólk er með leiðindarstæla við mann. Hef alltaf verið dugleg að mæta í vinnuna í hvernig ástandi sem er en nú er ég komin með nóg. Er líka komin með bakverki og mæði og er ekkert að ráða við að dröslast upp og niður alla þessa stiga sem eru þar. Ég held að það sé kominn tími á að nýta sér óléttuástandið og gá hvort einhver læknir vill ekki aumka sig yfir mig og gefa mér svona free from work card. Ég á það bara alveg skilið
2/05/2005 10:43:00 e.h.
föstudagur, febrúar 04, 2005
Oh We're Not Gonna Take It
no, We Ain't Gonna Take It
oh We're Not Gonna Take It Anymore
we've Got The Right To Choose And
there Ain't No Way We'll Lose It
this Is Our Life, This Is Our Song
we'll Fight The Powers That Be Just
don't Pick Our Destiny 'cause
you Don't Know Us, You Don't Belong
oh We're Not Gonna Take It
no, We Ain't Gonna Take It
oh We're Not Gonna Take It Anymore
oh You're So Condescending
your Gall Is Never Ending
we Don't Want Nothin', Not A Thing From You
your Life Is Trite And Jaded
boring And Confiscated
if That's Your Best, Your Best Won't Do
oh.....................
oh.....................
we're Right/yeah
we're Free/yeah
we'll Fight/yeah
you'll See/yeah
oh We're Not Gonna Take It
no, We Ain't Gonna Take It
oh We're Not Gonna Take It Anymore
oh We're Not Gonna Take It
no, We Ain't Gonna Take It
oh We're Not Gonna Take It Anymore
no Way!
2/04/2005 02:15:00 e.h.
miðvikudagur, febrúar 02, 2005
Ég er með furðulega flensu. Er ekki með hita en flest allt annað. Er ekkert mjög óhress en get samt ekki gert neitt án þess að sofna. Hver veit nema þetta sé bara eðlilegt óléttuástand. Ætla því að drulla mér aftur í vinnuna á morgun. Þýðir örugglega ekkert að bíða þar til þetta líður hjá. Er búin að sjá nokkrar skemmtilegar myndir í veikindunum sem óhætt er að mæla með eins og Coffee and Cigarettes og World Police. Skemmtilegust fannst mér þó heimildarmyndin um Mjóddina sem var sýnd í sjónvarpinu um daginn. Sjaldan skemmt mér betur. Meira man ég ekki alveg. Kveðjupartý Jóhönnu á Kaffi kúltúr og afmælisveisla hjá Svaný systur. Skjaldbökurnar elska rækjur og í gærkvöldi föttuðum við allt í einu að það voru menn í pottinum okkar. Sem betur fer þekktum við þá og þeir voru í nærbuxum. Hannes er að fuðra upp af fæðuofnæmi og eftir þessa viku (þurfum tíma til að klára birgðirnar) verður aðeins heilsufæði á boðstólum hér. Þarf sem sagt að redda mér læstum nammiskáp. Nokkrar bumbumyndir komnar inn á barnaland. Hún myndast samt ekkert svo ofsalega vel. Lætur fara minna fyrir sér en raunin er. Var að fá sent meðgöngubelti (e-bay) til að halda henni uppi. Ég held að ég sé ekki alveg að setja það rétt saman. Það fylgdu engar leiðbeiningar. Sendillinn var samt sætur.
2/02/2005 09:31:00 e.h.
þriðjudagur, febrúar 01, 2005
!!!Til hamó með 20 ára ammó Svaný systir!!!
2/01/2005 04:19:00 e.h.
|
|
