|
|
Jafnvel hinn minnsti froskur er mikill í sínum eigin forapolli
|
|
| |
|
|
| |
|
|
|
|
|
| |
föstudagur, október 31, 2003
Ég er nú ekki mikið fyrir að púkka upp á erlenda hátíðisdaga, en Halloween er ljómandi góð afsökun fyrir því að halda hryllingsmyndakvöld. Ég er búin að skreyta stofuna og litlu afbökuðu systkini mín eru á leiðinni. Eftir stopp á Laugarásvídeó ætlum við að kíkja í Nóatún og gá hvort við finnum ekki eins og eitt stykki grasker til að slátra. Hef aldrei smakkað grasker, þau eru örugglega vond. Ekki eins vond og hádegismaturinn í leikskólanum í dag. Það var súrt slátur. Talandi um systkini þá er Lovísa systir mín byrjuð að blogga. Hún er skrýtin. Við erum öll skrítin múhahahaha.
10/31/2003 05:40:00 e.h.
fimmtudagur, október 30, 2003
Var að fá senda mynd af mér og pabba frá spurningarkeppni Skýrr sem ég sagði ykkur frá um daginn.
(ég greinilega nýbúin að reyta af mér brandara)
Tölvupóstar hafa víst gengið manna á milli í Skýrr þar sem ýmsar spurningar og svör í keppninni eru véfengd. Hefur spurningahöfundur nú viðurkennt mistök sín í a.m.k. tveimur spurningum sem við í ABBA liðinu svöruðum rétt en fengum rangt fyrir (sorry Jónsi ég er búin að gleyma hvernig þær voru - eitthvað um fjölda liðsmanna í Rolling Stones og lönd sem eiga landamæri að Kína). Svo við töpuðum sennilega ekki þegar öllu er á botninn hvolft....a.m.k. ekki með eins miklum mun. So there.
10/30/2003 11:45:00 e.h.
Annar erfiður dagur í vinnunni. Kvenhormónin og baktjaldamakkið þar alveg að sjóða upp úr öllu valdi. Á svona dögum finnst mér gott að kíkja á síðuna worstjob.com. Það róar mig.
10/30/2003 10:54:00 e.h.
miðvikudagur, október 29, 2003
Þar sem ég er hálfur Kópavogsbúi hlýnaði mér um hjartaræturnar þegar mamma sendi mér þetta lag í tölvupósti
Ást á pöbbnum
Hún hitti hann á pöbb eitt kvöld
á Country pub í Reykjavík
Hún starði á hann mjög ákveðinn
Hann glápti á móti dauðadrukkinn
Hún kinkaði kolli og blikkaði hann
Hann var dáleiddur af allann Vodkann
Hann fór til hennar og sagði
hvar hann var frá
Hún sagði "Veistu hvað?"
Við höfum sameiginlegt
því við komum bæði frá Kópavogi
Chorus
Ást á pöbbnum, þau féllust í ást á
pöbbnum
Nú grætur hann - Hann átti að kynnast
henni fyrst
Hún eyðir öllu hans fé. Hann sparar
ekki neitt
Hann vildi kaupa hús, en hann á varla
fyrir öl krús
Til að gera allt verra hann missti vinnuna
í staðinn að vinna fór hann norður með henni
Hún dróg hann til Akureyrar
Þau dönsuðu línudans fram til klukkan 3
Syngjandi.....við komum bæði frá Kópavogi.
10/29/2003 10:40:00 e.h.
ÞETTA ER FOKKINGS FRÁÁÁÁÁÁÁÁÁÁÁÁÁBÆR MYND!!!!!
"I didn't ask for a shrink - that must've been somebody else. Also, that pudding isn't mine. Also, I'm wearing this suit today because I had a very important meeting this morning and I don't have a crying problem. "
10/29/2003 12:54:00 f.h.
þriðjudagur, október 28, 2003
Annað hvort hafa leikskólabörn óþroskað bragðskyn eða þá að þau eru óhræddari við að éta hluti sem við ályktum að bragðist illa en gera það ef til vill alls ekki. Í morgun kom smá haglél sem myndaði örþunna snjóbletti í leikskólagarðinum. Þegar börnunum var hleypt út trylltust þau af fögnuði, hlupu út um allan garð að leita sér að skóflum og tóku svo strax til við að skófla haglélinu upp í sig. Það er svo sem ekkert að því að éta snjó svo lengi sem hann er ekki gulur hehe en þetta var nú varla snjór. Í skóflunum var svona 1/8 snjór, hitt var allt sandur og drulla sem þau átu skælbrosandi með bestu lyst. Þetta kom mér svo sem ekki á óvart því á rigningardögum þamba þau drullupollavatnið og bryðja steina. Mér finnst bara fáránlegt að jafnvel matvöndu krakkarnir sem væla alltaf þegar þau þurfa að smakka eitthvað nýtt í hádegismatnum hakki í sig sand og drullu eins og það væri bláberjaskyr. Kannski bragðast þetta eins og bláberjaskyr en ég ætla ekki að smakka, ég er svo matvönd.
10/28/2003 11:04:00 e.h.
Já þið hélduð örugglega að ég hefði verið voða full um helgina og svona. Ekki getað bloggað vegna þynnku. O nei. Ég var bara og er enn þá hundveik og með svo mikinn hor að þegar ég beygi mig þá þrýstir horinn á heilann svo ég fæ höfuðverk og það líður næstum yfir mig. Ég veit, ég veit, ekki beygja þig. Svo þarf maður heldur ekkert að beygja sig til þess að blogga en það gerðist bara ekki nokkur skapaður hlutur um helgina. Ég horfði á handfylli af DVD myndum þar á meðal Anger Management fjórum sinnum og hún varð alltaf betri og betri. Já og fór í smá kökuafmæli til Maríu Hannesarsystur. Til hamingju María mín...og Jóhanna líka....við gefum þér bara sportbíl í þrítugsammælisgjöf. Við gleymdum nebblega ammælinu hennar Jóhönnu skamm skamm. Og svo gistu systur mínar hjá okkur og hnakkrifust allan tímann. Og jú við fórum á Kill Bill í gær svo þetta var svo sem ekki algjörlega viðburðasnauð helgi þótt hún hefði liðið hjá í móðu, hor og hóstaköstum. Talandi um það...hvað var ég að pæla að fara í bíó með hósta!? Ég sturtaði í mig hóstamixtúru áður en við fórum og hélt að það myndi duga en um leið og treilerarnir voru búnir byrjaði martröðin. Ég rembdist svo mikið við að halda hóstunum inni að ég gat ekkert einbeitt mér að myndinni. Svo var ég svo tillitsöm að taka aðeins hóstaköst í háværu atriðunum en missti þar af leiðandi alveg af þeim. Ég veit að það telst nánast guðlast að finnast þessi mynd ekki endalaust góð en æ. Mér fannst hún eitthvað svo tilgerðarleg (rauðakross augnleppurinn á sjúkrahúsinu var einum of). Svo hefði hann alveg mátt vera duglegri á klippigræjunum svo hann gæti troðið þessu í eina mynd. Hafa bara DVD útgáfuna í fullri lengd. En hey þú veist hún var geðveikt góð og allt og þetta var örugglega bara hóstinn að tala. Jæja, ég verð að fara að sofa, er enn þá að mæta veik í vinnuna. Vona bara að ég verði ekki vakin með sama hætti og í morgun. Þá bankaði hér maður upp á kl. 8 og spurði eftir Hannesi. Þegar ég sagði honum að hann væri farinn í vinnunna gaf hann mér dauða gæs. Ég hélt þetta hefði verið draumur þar til ég kíkti í frystinn eftir vinnu. Látið mig endilega vita ef þið eigið einhverjar uppskriftir þar sem gæs kemur við sögu.
10/28/2003 01:54:00 f.h.
fimmtudagur, október 23, 2003
Það var bara fínt að vera veik í vinnunni. Það var hins vegar ekki sniðugt að fara veik í Kringluna. Ég á engan pening en í einhverju óráði keypti ég föt og annan óþarfa fyrir...tja dágóða upphæð...Og ég hef greinilega verið sárlasin því ég fór í Hagkaup og keypti báðar nýju líkamsræktarspólurnar með Ágústu Johnson! Ætli ég verði ekki bara að fara að láta Hannes geyma VISA kortið mitt, ég er ekki alveg að höndla það. En ég er samt ánægð með nýja dótið mitt.
Það er margt sem maður tekur uppá þegar maður er veikur. Ég er búin að vera voða dugleg, raðaði öllum geisladiskunum okkar í stafrófsröð og taldi þá. Þeir reyndust vera 440 talsins fyrir utan alla brenndu diskana. Það er nú dágott. Að vísu er a.m.k. 1/3 hluti þeira algjört rusl en Hannes tímir ekki að losa sig við neitt. Ég raðaði þeim fyrst í bunka og þótti athyglisvert að B og S bunkarnir voru langhæstir. Ætli hægt sé að draga þá ályktun af þessu að í heildina byrji langflestir listamenn og hljómsveitir á B eða S? Reyndar raðaði ég listamönnunum eftir fyrra nafni en ekki seinna enda samræmist það íslenskum hugsunarhætti. Úff ég held ég sé komin með óráð aftur. Ég gæti sagt ykkur margt fleira um þessa geisladiskaflokkun mína en eitthvað segir mér að þetta sé ekki mjög áhugaverð lesning. Ég ætla að fara að leggja mig. Líður hálf undarlega. Þarf að safna kröftum. Náttfataball í leikskólanum á morgun.
10/23/2003 10:08:00 e.h.
miðvikudagur, október 22, 2003
Þar kom vel á vondan. Nú er ég orðin veik með hita og allt en þori ekki annað en að mæta í vinnuna á morgun þar sem ég er alltaf sítuðandi um hvað konur séu miklir aumingjar, alltaf veikar og vesen á þeim. Vá þetta var löng setning. Ég var að tuða yfir þessu nú síðast í dag og þó það hefði verið hægt að túlka tuð mitt á þann veg að "konur" þýddi "konur...og ég líka" þá held ég að það hafi frekar komið út "konur...og sérstaklega þið". Æ, ég held samt að ef það væru karlar að vinna þarna líka myndi ég örugglega segja að fólk væri aumingjar, ekki bara konur. Það er bara pirrandi að það skuli ekki vera nema að meðaltali einn dagur í viku sem allir starfsmenn eru mættir. Þegar það vantar einhvern þýðir það meira álag á hina. Það er auðvitað pirrandi til lengdar og útskýrir biturleika minn í garð kvenna....eða leikskólastarfsmanna. Veit ekki hvort þetta er svona á öllum vinnustöðum, ég hef nú ekki unnið á svo mörgum. Í Hagkaup voru bara unglingar og allar fjarvistir útskýrðust af þynnku, og jú það var mikið af þeim. Á Rás 2 var hins vegar nánast ekkert um veikindi enda voru allir þar mjög ábyrgðarfullir. Ætli þetta hafi ekki mest með laun að gera. Leikskólastarfsmenn eru náttúrulega á kúkalaunum og ég skil svo sem að fólk nenni ekki að mæta slappt í vinnuna fyrir ekki neitt.
10/22/2003 11:27:00 e.h.
þriðjudagur, október 21, 2003
Ein aðal ástæða þess að ég vinn á leikskóla er sú að 2-3 ára krakkar eru með nákvæmlega sama húmor og ég. Þegar þeir eru ekki kúkandi og pissandi í sig, öskrandi og berjandi hvern annan eru þeir ógurlega skemmtilegir þótt það sé oftast óviljandi. Við á deildinni okkar vorum að búa til nýja gullkornabók og þar sem ég er með þá gömlu hjá mér ætla ég að setja nokkur korn á bloggið. Kannski eru þau ekkert fyndin ef maður þekkir ekki viðkomandi krakka en mér finnst þau a.m.k. æði.
Bergur úti: "Hey Ragna, ég er að tína laukblöð!"
Þór fóstri: "Hvað heitir gatan þín Darri?"
Darri: "Hún heitir Reykjavík 2"
Anna var að skoða myndir af jólasveinunum og reyndi að átta sig á hver var hvaða sveinn:
Anna: "Þetta er Skyrgámur".
(Næst á eftir kom mynd af Bjúgnakræki)
Anna: "Þetta er Pulsugámur"
(Svo kom Kertasníkir)
Anna: "Og þetta er Eldspýtusveinninn!"
Óskar og Bella voru að leika í salnum og verið var að senda þau upp á deild.
Óskar: "Heyrðu Bella, ég er sjoppukallinn og við eigum að fara upp í kjallara ókey!?"
Anna var að segja sögu:
Anna: "Þegar fuglarnir komu inn í húsið, þá voru engin hús og engin teppi, svo þeir fóru bara"
Finnbogi: "Hulda má ég koma heim til þín"
Hulda: "Já, ég elskar þér"
Finnbogi: "Já"
Bergur: "Strákar eru töffarar"
Anna: "Já, þeir kunna að galdra"
Ragna fóstra: "Nei , það eru töframenn"
Anna: "Já Bergur, þú ert töframaður"
Óskar hnerrar
Ragna fóstra: "Guð hjálpi þér Óskar minn"
Óskar: "Já, guð hjálpi þér Ragna"
Óskar á í samtali við Fríði fóstru.
Óskar: "Eyjólfur er snillingur"
Fríður: "Af hverju segirðu það?"
Óskar: "Því hann er strákur. Strákar eru snillingar"
Þór fóstri mætir í vinnuna
Kristín: "Hey sjáiði, það er kominn Þór!"
10/21/2003 10:12:00 e.h.
mánudagur, október 20, 2003
Voðalega er undirtitillinn á síðunni minni viðeigandi alltaf. Þetta með botninn og skófluna. Eins og þið vitið þá er nýbúið að stela hjólinu mínu og símanum. Auk þess hef ég í ógáti mínu eytt óafsakanlegum upphæðum á börum að undanförnu. Ég ákvað því að endurnýja þessa hluti ekki strax og hætta að fara út um helgar þar sem ég þarf að fara að spara fyrir jólagjöfum. Ég var nokkurn veginn komin með karmað í jafnvægi...en í dag beið mín óvæntur "glaðningur" í bréfalúgunni. Fokkings helvítis reikningur upp á fokkings helvítis 130.000 kall frá einhverjum lífeyrissjóði með eindaga á föstudaginn. Ég steingleymdi víst að borga í lífeyrissjóð þessa mánuði sem ég vann á Rás 2 í fyrra. FOKKING HELL!!! Djöfulsins andskotans vitleysa! Einu sinni vildi ég ekki verða gömul en nú ætla ég svoleiðis að ná himinháum aldri svo ég geti blóðmjólkað þessa sjóði maður. ÉG ÆTLA AÐ LIFA AÐ EILÍFU HELVÍTIN YKKAR!!!!!!!!!! FOOOOOOOOOOOKKKKKKKK YYYOOOOOOUUUUUUUU!!!!!!!!!!!!!!!!
10/20/2003 09:43:00 e.h.
sunnudagur, október 19, 2003
Þar sem ég eyddi svo miklu á barnum um síðustu helgi, týndi nýja símanum mínum og var þunn í sólarhring ákvað ég að refsa sjálfri mér og fara ekkert út um þessa helgi. Þetta var afar hörð refsing því hún fól það í sér að missa af Airwaves. Með sorg í hjarta fór ég beint út á vídeóleigu eftir vinnu á föstudag, tók tvær myndir og keypti huggunarnammi. Síðan kom ég mér fyrir fyrir framan sjónvarpið með nammið og stóra plöstunarvél sem ég fékk lánaða á leikskólanum. Þar sem þetta átti að vera innihelgi ákvað ég að ráðast í það verkefni að plasta allar uppskriftir sem ég hef klippt út úr blöðum síðustu ár. En þá hringdi síminn sem leiddi til þess að ég eyddi kvöldinu í árlegri spurningakeppni Skýrr hf. Það sem maður lendir ekki í.
Símtalið var sem sagt frá honum pabba sem hefur unnið hjá Skýrr frá því fyrirtækið kallaðist enn Skýrsluvélar ríkisins og Reykjavíkurborgar. Hann er að mig grunar ansi virkur í félagslífi fyrirtækisins og er í einhvers konar gleði- og tippklúbb útvaldra starfsmanna sem nefnist ABBA. Félagarnir í ABBA eru miklir djókarar og montrassar og hafa oftar en ekki sigrað þessa keppni og er spurningahöfundur víst vísvitandi farinn að semja spurningar sem liggja utan þeirra áhuga- og þekkingarsviðs. Keppnin er opin mökum líka en þar sem mamma harðneitaði að fara og einhver veikindi voru í ABBA hópnum ákvað pabbi að tefla mér fram sem leynivopni. Ég átti að vera fulltrúi yngri kynslóðarinnar í þessu 7 manna liði ABBA en sökum bjórdrykkju og þess að það voru ekki margar spurningar sem reyndu á afþreyingarmenningu varð ég mér aðallega til skammar. Ég gat þó alla vega svarað einni spurningu sem enginn annar liðsmaður hafði hugmynd um: Hvað hljómsveitin sem tók óvænt lag á Foo Fighters tónleikunum hét: (Nilfisk). En það dugði ekki til. ABBA tapaði við mikinn fögnuð hinna liðanna. Annars held ég að við höfum bara verið of gáfuð fyrir þessa keppni því við krufðum spurningarnar of mikið. Þegar það var t.d. spurt á hvoru auganu Stjáni blái væri blindur (50/50 spurning) svöruðum við hvorugu. Og eitt sinn þegar gefnir voru þrír valkostir í svari gáfum við upp þann fjórða þar sem spurningin var greinilega vitlaus. Ég man ekki lengur hver spurningin var. Drakk nokkra kanadíska bjóra og hef annað hvort enn þá verið með áfengi í blóðinu frá síðustu helgi eða þá að ég er orðin of gömul því ég var þunn fram á laugardagskvöld.
Þá keyptum við Hannes kínamat og nýja Pantera safndiskinn en honum fylgdi DVD diskur. Við eyddum því laugardagskvöldinu í að horfa/hlusta á Pantera á meðan við plöstuðum inn uppskriftir. Mjög súrrealískt.
10/19/2003 05:43:00 e.h.
fimmtudagur, október 16, 2003
Never hold your farts in. They travel up your spine, into your brain, and that's how you get shitty ideas.
10/16/2003 10:24:00 e.h.
miðvikudagur, október 15, 2003
Ógeðslega er dípressing að koma heim úr vinnunni og sjá öll þessi haustfiðrildi við dauðans dyr klesst upp við húsvegginn hjá útiljósinu. Svo sleppa alltaf einhver inn og flögra veiklulega um þar til þau drepast ofan í ljósakrónunni og ég þarf að horfa á skuggann af þeim. *andvarp* Ég er bara farin að sofa.
10/15/2003 09:48:00 e.h.
þriðjudagur, október 14, 2003
That's it. Nú er ég hætt að drekka......svona mikið. Þvílíkur viðbjóður og vítiskvalir sem ég leið á sunnudaginn. Að vísu var ég með fimm kommur þegar ég fór út á laugardagskvöldið svo almenn veikindi hljóta að hafa blandast við þynnkuna en juuuu minn eini. Svo voru tengdaforeldrar mínir svo góðir að bjóða okkur út að borða á sunnudagskvöldið. Austur Indíafjélagið er að öllu jöfnu uppáhalds staðurinn minn en í þetta skiptið þurfti ég virkilega að passa mig á að gubba ekki yfir borðið og fjölskyldu Hannesar. That's it. Nú held ég mig bara heima fyrir framan risasjónvarpið.
Svo ég reki mig samt í gegnum helgina var örlítið forskot tekið á fimmtudagskvöldið þegar Steini Plastik var svo indæll að bjóða okkur á tónleikana sína. Það var voða fallegt og svona þótt ég hafi takmarkað þol fyrir ambient tónlist. Þar knúsuðum við Bryndísi sem er nýkomin heim frá Belgíu. Ég var orðin hrædd um að hún kæmi ekkert til baka eftir síðasta e-mail sem ég fékk frá henni: "Ég á að giftast suðurafríkubúa í dag svo hann fái evrópskt vegabréf, ég var seld í gær svo nú þarf ég að undirbúa brúðkaup. Jæja, best að hætta að fresta þessu og hætta sér fram á klósett, whish me luck..." En hún var í fullu fjöri.
Svo fórum við á hafnfirskt leikhús á föstudagskvöldið. Vinur minn heimsendir. Það var nú skrýtið og jafnvel gaman þótt ég hafi takmarkað þol fyrir leikhúsi. Dvergur, slanga, bananar, prump, gubb, piss og dónaskapur. Það er ég viss um að fólkið sem fordæmdi Jackass sýninguna fyrir nákvæmlega sama dónaskap fellir hann undir hatt menningar og listar í þessari sýningu. En Ólafía Hrönn var alveg frábær. Skemmtilegastir fundust mér þó áhorfendurnir. Það vildi nefninlega svo til að á sýninguna kom rúta af tja... svo ég orði það nú á pólikískt réttan hátt...andlega fötluðu fólki. Uppnám komst í raðir þeirra þegar tilkynnt var að ekkert hlé yrði á sýningunni: "ha ekkert hlé...EKKERT HLÉ!!!!!" hrópaði einn mongólítinn þegar vonir hans um hressingu í sjoppunni urðu að engu. Síðan byrjaði sýningin og með reglulegu millibili heyrðust fliss, uml og undrunarhróp þeirra megin í salnum: "Ha typpi!!!" "ojjjj" og "ja hérna". "Hvað eru þau eiginlega að gera!?" spurði einn fylgdarmann sinn forviða þegar dvergurinn svolgraði í sig sæði úr glasi og spýtti í slöngu tengda undir kjól Ólafíu Hrannar. Fátt var um svör.
 
Á laugardagskvöldið var loksins komið að almennilegri tegund skemmtunar: rokktónleikum. Eftir að ég og Bryndís höfðum eldað saman rómantískan kvöldverð og eytt stórfé í að essemmessa Popp Tíví til þess að fá Foo Fighters myndbandið Low sýnt var farið á tónleika með Mínus og Brain Police á Grand Rokk. Það var nú gaman. Mikið eru þetta nú fallegir drengir. Sérstaklega söngvarinn í Brain Police þegar hann er orðinn sveittur og farinn úr að ofan. Mér tókst samt að halda mér í brjóstahaldaranum í þetta skiptið. Skrítið finnst mér þó þar sem áhorfendaskarinn er yfirleitt 90% karlmenn að drengirnir skuli viðhafa svo mikla kynferðislega tilburði. Þeir eiga það nefninlega báðir til að stinga hendinni ofan í nærbuxurnar og hnykkja mjöðmum til á meðan sveittur karlaskarinn ærist og hoppar hálfber hver ofan á annan. Hvað er það? Reyndar er ég alltaf að átta mig betur og betur á því að fótbolti og rokktónleikar eru eina leið gagnkynhneigðra karlmanna til þess að tjá samkynhneigðar kenndir sínar án fordæmingar. Og það er bara fallegt. Anyway, eftir tónleikana lá allt niður á við. Debetkortið var straujað meira en góðu hófi gegndi og glös eftir glös af tvöföldum sítrónuromm í sódavatni hurfu ofan í veikan líkama minn sem hristi sig af öllum mætti á dansgólfinu á 22. Þegar ég var farin að spýta á gesti staðarins og þeir farnir að ókyrrast og líta mig illu auga fór ég og fékk mér pulsu sem ég reyndi að klína ofan í mig á leiðinni heim. Hún endaði svo í klósettinu ásamt rómantíska kvöldverðinum og einhverju fjólubláu dóti nokkrum tímum seinna. That's it. Nú er ég hætt að drekka...mikið.
PS: Ef einhver hefur séð nýja Sony Ericsson myndavélasímann minn sem týndist/var stolið? þetta kvöld má sá hinn sami endilega hringja í heimasímann minn.
10/14/2003 10:16:00 e.h.
föstudagur, október 10, 2003
!!!!!WWWWOOOOOOHHHHHHHOOOOOOOOOO!!!!! ÞAÐ ER KOMINN FÖSTUDAGUR!!! Og hér er lag í tilefni þess. Nú er bara að hækka almennilega í tölvunni (og ýta á refresh svo hann spædí geti dansað með).
10/10/2003 06:00:00 e.h.
fimmtudagur, október 09, 2003
Við erum komin með heitan pooohhoott!...liggaliggaláááái. Það er naumast hvað maður er endalaust flottur á því ha. Þetta ætti ekki að koma vinum og vandamönnum mikið á óvart enda höfum við talað um þennan pott í marga mánuði. Eða jú þetta kemur þeim sennilega á óvart því þeir héldu fæstir að talið yrði að veruleika. Við pöntuðum hann nefninlega á netinu í sumar og fengum hann loks sendan frá Kanada um daginn. Þetta tók sinn tíma og undir lokin vorum við sjálf búin að missa vonina. En nú er hann kominn ósamsettur í einum 400 kílóa kassa. Við erum ekki búin að setja hann saman svo það þýðir ekkert að koma bankandi upp á á sundskýlunni einni fata strax. Enda væri engin þörf á sundskýlu....Hannes er nefninlega löngu farinn að stunda það að leigja sundskýlur í sundlaugum bæjarins og stela þeim svo fyrir framtíðar pottgesti. En stelpur verða svo bara gjössovel að vera á tittsunum.
Hér er mynd af samskonar potti af heimasíðu fyrirtækisins sem við keyptum hann af:
Þetta er sumsé trétunna úr sedrusviði sem rúmar sex fullorðna eða fjóra feita.
10/09/2003 08:32:00 e.h.
miðvikudagur, október 08, 2003
Jæja þá er maður búin að taka til í hlekkjunum. Þeim er nú raðað eftir flokkum auk lengd titla. Ef bendillinn er látin hvíla á hlekknum um stund birtast þar leyndar upplýsingar. Svona er maður nú orðinn klár. Allt er þetta hið skemmtilegasta fólk en ég leyfi mér að vekja sérstaka athygli á eftirfarandi hlekkjum: Hann Jón Svanur er byrjaður að blogga aftur af krafti enda svo sem lítið annað að gera á Eskifirði. Hann dælir nú frá sér löngum pistlum um lífið sem nýbakaður þriggja barna faðir og grunnskólakennari. Hljómar kannski ekki ýkja spennandi en er afar heillandi og fyndin lesning. Ef þið síðan heillist af heimi Jónsa væri ekki úr vegi að verða sér út um ítarefni og kíkja á blogg kvensunnar sem tældi hann til Eskifjarðar. Síðan er það hann Steini. Steini varð greinilega fyrir einhverri hugvíkkandi uppljómun þegar hann og Bryndís vinkona mín hættu saman og vellur nú upp úr honum snilldin. Ég leyfi mér að vitna í hans nýjustu bloggfærslu: "Ég hef alltaf vitað mitt sanna nafn, þó svo að foreldrar mínir viti það ekki enn. En ég gerði mér aldrei fyllilega grein fyrir þýðingu þess fyrr enn nú. Jarðeskar tungur geta ekki borið það fram né getur heili þinn meðtekið merkingu þess. En það mun koma sá tími sem nöfn allra í fjölskyldu minni, allra minna bræðra og systra sem búa hér á jörðinni eða í nágrenni hennar, munu heyrast yfir allt sólkerfið í kór og mynda Orðið sem á eftir skapa nýtt jafnvægi í heiminum.". Að lokum eru það dömurnar á Dömustöðum sem kæta mig hvern dag. Ég þekki þessar rokkskvísur ekki persónulega en þær eru greinilega eðalpíur. Svona eiga stelpur að vera. Góða skemmtun
ps: Ég hló svo mikið að ég prumpaði á starfsmannafundi áðan og enginn minntist á það.
10/08/2003 10:19:00 e.h.
þriðjudagur, október 07, 2003
Já góðan daginn bara! Þá er maður búinn að jafna sig eftir helgina og ekkert annað að gera en að hefja bloggvikuna. Finn ég hjá mér þörf til þess að gefa skýrslu um helstu atburði nýliðinna daga og fer hún því hér á eftir:
Föstudagur: Hryllingsmyndakvöld með Auðbrekkusystkinunum.
   
Svaný systir hitti víst "frægan" Hollívúdd leikara í fyrirsætuferð sinni til New York um daginn. Sá heitir Ron Milkie og hefur unnið sér það eitt til "frægðar" að hafa leikið löggu í aukahlutverki í fyrstu Friday the 13th myndinni. Síðan þá hefur Svaný ekki unnt sér friðar enda ekki séð myndina og hún ekki til eða týnd á þeim vídeóleigum sem við höfum farið á síðustu hryllingskvöld. Við ákváðum því að heimsækja Laugarásvídeó enda heyrt lofi á þá leigu ausið í gegnum tíðina en aldrei komið þangað inn. Um leið og ég gekk inn og sá stæðurnar af DVD myndunum opnuðust himnarnir og ég heyrði í englakór..... HAAAAAAAALELLLÚJJA HALLLLEELLLÚJA HALLLLELÚJA. Mig grunaði að þetta væri góð leiga en juuuuuu minn eini, mig óraði ekki fyrir þessu. Þarna voru titlar eins og t.d. Nightmare in a Damaged Brain hvað sem það nú er og Puppetry of the Penis hin frábæra typpasýning á DVD. Við Svaný gengum þarna um með munninn opinn og tár í hvörmum og hefðum viljað dvelja lengur, en Dominos pizzurnar biðu og við þurftum að grípa það sem við komum til að finna: Friday the 13th I og tókum II í þokkabót en gátum ekki stillt okkur um að taka einnig Evil Dead II og eitthvert skrípi sem hét the Frostbiter. Þær reyndust allar vera hver annarri ömurlegri nema að sjálfsögðu Evil Dead II en á heillandi hátt þó. Svo ég vitni nú í einn sem gaf myndinni Frostbiter sína bestu dóma á Internet Movie Database: "Ahhhhh, the chili monsters. The chili monsters are one of the most brilliant creatures ever developed on the silver screen and their scene includes a brilliant piece of music to go along with it. After seeing this scene and hearing the music you will never want to see another movie. See this movie if you want to have a good time. Trust me" Ekki myndi ég nú ráðleggja neinum að sjá þessa mynd en rétt er það að soundtrackið er aaaaafar athyglisvert. Ég finn það þó hvergi til sölu á netinu, sorglegt það. Anyway, það skrítna er að þegar ég legg myndirnar á borðið og segist aldrei hafa leigt þarna áður, brosir kallinn til mín og segir" Nei...ég veit". Þarna á ég eftir að vera fastagestur.
Laugardagur - kortið straujað í raftækjaverslun og farið í karaoke.
En til þess að geta horft almennilega á allar myndirnar sem ég ætla að taka í Laugarásvídeó þurfti ég nýtt sjónvarp. Hannes og ég fórum því í búðarráp á laugardaginn til þess að kaupa sjónvarp á útsölu fyrir peninginn sem við fengum frá tryggingunum eftir að hitt brann. Við enduðum að sjálfsögðu á því að eyða þrisvar sinnum hærri upphæð í 32" 100 riða (whatever the hell that is) widescreen sjónvarp með flötum skjá. Júhú! Nú verður gaman!! Ein helsta ástæða þess að við keyptum það var þó að það var svart á litinn. Það eina sem var svart á litinn. Hin voru öll grá eða silfurlituð. Kallinn í búðinni sagði að þetta væri bara tískan í dag. Ojj bara. Silfurlitað sjónvarp hefði ekki passað við neitt hjá okkur. Hannesi var samt skítsama hvernig sjónvarpið yrði á litinn svo hann var orðinn frekar pirraður en ég fékk mínu framgengt. Svo fór ég beint í óvissuferð með fyrrverandi og núverandi starfsmönnum leikskólans. Hún hófst á mexíkóskum mat og endaði á Ölveri. Hér eru nokkrar stafrænar minningar frá kvöldinu: (yours truly er önnur frá vinstri á fyrstu myndinni)
Þetta var nú bara skemmtilegt og allt fór vel fram svona framan af.....þar til ég fór á 10 glasi að syngja metal útgáfu af Paradise By the Dashboard Light og ein fóstran handleggsbrotnaði. Þessir atburðir voru þó sem betur fer ótengdir. Hannes talaði ekkert við mig á sunnudaginn því ég var víst svo full og leiðinleg þegar ég kom heim. Hmmmm, ég held ég haldi mig bara heima hjá sjónvarpinu næstu helgar.
Sunnudagur - Rannsókn á huliðsheimum
Ég má að lokum til með að minnast á þessa frönsk/íslensku heimildarmynd um huliðsheima sem ég fór á í bíó í gær. Ég bara varð að fara á hana eftir að ég las í Mogganum að á frumsýningunni hefði allt verið stappað af framliðnum áhorfendum. Þeir miðlar sem voru viðstaddir sögðu að draugarnir hefðu setið á milli sætanna en að flestir þeirra hefðu yfirgefið salinn þegar farið var að fjalla um geimverur því þeim fannst þetta svo mikið rugl. Mér fannst þetta bara hin fínasta mynd en leiðinlegt að heyra að áran í kringum hausinn hverfi við mikla farsímanotkun og að gráar geimverur séu komnar inn í stjórnkerfið og fjármálaheiminn. Heimur versnandi fer. Jæja, er farin niður að horfa á stóra sjónvarpið.
10/07/2003 07:32:00 e.h.
miðvikudagur, október 01, 2003
Nemendaskrá MK.
Alveg er þetta systur minni líkt....hengur á netinu þegar hún á að vera að læra.
10/01/2003 11:12:00 e.h.
|
|
| |
|
|
|
